Լսարանի վրա անմիջապես ազդող մարքեթինգային ռազմավարություն մշակելու համար շատ ժամանակ և ջանք է հարկավոր: Դրանից բացի, շատ ուսումնասիրություններ է պետք անել, քանի որ վերջնական արդյունքում մենք ցանկանում ենք մրցակիցների հանդեպ նոր առավելություններ ձեռք բերել և զարգացման այլ ուղիներ գտնել:

Լինում են  այնպիսի պահեր, երբ մենք  հայտնվում ենք փակուղում և վիճակն անելանելի է թվում: Այսպիսի դեպքերից խուսափելու համար առանձնացրել ենք մարքեթինգային ռազմավարության այս 15 օրինակները, որոնք կօգնեն արթնացնել Ձեր ստեղծարար էներգիան:

1․ Համագործակցություն այլ կազմակերպությունների հետ

Մարքեթինգային արշավի իրականացման ընթացքում ստեղծված համագործակցությունները բազմաթիվ դրական կողմեր ունեն, հատկապես դրանք օգնում են հասնել ավելի նշանակալի արդյունքների: Նախևառաջ, երբ համագործակցում եք ինչ որ մեկի հետ, դա օգնում է Ձեզ ավելի լավ բովանդակություն ստեղծել ու ավելի լավ գաղափարներ գեներացնել: Համագործակցության արդյունքում նաև արշավի մշակման ծախսերն են կրճատվում, հաջողության հասնում եք ավելի արագ ու, որ ամենակարևորն է, ներկայացնում եք Ձեր ապրանքանիշը նոր լսարանի:

Օրինակ, Converse-ը միավորվեց Guitar Center-ի հետ «Ռետինե հետքեր» խորագրով երաժշտության ձայնագրման համար: Այնուհետև այս երաժշտությունն օգտագործվեց YouTube-յան տեսահոլովակների շարք ստեղծելու համար, որոնք ուղղված էին երաժիշտներին:

2. Օգտագործեք օգտատերերի֊ ստեղծած բովանդակությունը

839 միլենիալների հետ անցկացված հարցման համաձայն՝ նրանք օրական 5.4 ժամ են ծախսում իրենց հասակակիցների կողմից ստեղծված բովանդակության հետ ծանոթանալու վրա: Սա, առհասարակ, մեդիայում իրենց անցկացրած ժամանակի 30 տոկոսն է և մրցակցում է միայն ավանդական մեդիայի վրա ծախսած ամբողջ ժամանակի հանրագումարի հետ (տպագիր մամուլ, ռադիո, հեռուստատեսություն՝ 33 տոկոս): Հարցման ընթացքում միլենիալներն ասել են, որ օգտատերերի կողմից ստեղծված բովանդակությունը 20 տոկոսով ավելի է ազդում գնումներ կատարելու իրենց որոշման վրա, քան այլ ԶԼՄ-ներ:

Բիզնեսում այս ցուցանիշները կարող եք օգտագործել Ձեր օգտին: Պարզապես առաջարկեք Ձեր հաճախորդներին կիսվել իրենց պատմություններով, փորձով և փոխանակվել մտքերով:  Համաձայնության դեպքում առաջարկեք նրանց գովազդի ստեղծման  համապատասխան գործիքակազմ:

3. Համագործակցեք ինֆլուենսերների հետ

Ձեր ոլորտում առաջատար ինֆլուենսերների հետ համագործակցությունը ևս մեկ միջոց է նոր լսարան գրավելու և բրենդի իրազեկվածության մակարդակը բարձրացնելու համար: Տան համար իրեր վաճառող Lowe ապրանքանիշն առաջատար դիզայներներին և մայրիկ-բլոգերներին թույլ էր տվել մի քանի օր շարունակ «գրավել» Instagram-ի իր էջը: Այդ ազդեցիկ մարդկանց թույլատրելով կիսվել ոգևորող և ներշնչող բովանդակությամբ՝ Lowe-ին կարողացավ իր համար նոր լսարանի ուշադրությունը գրավել:

4. Օգնեք հաճախորդներին լուծել իրենց խնդիրը

Ինչպես ասվում է HubSpot-ում․ «Դուք շարունակում եք աշխատել, որովհետև առաջարկում եք լուծումներ»: Մի քանի տարբերակներ, որոնցով կարող եք օգնել Ձեր հաճախորդներին լուծել իրենց խնդիրները․ կազմեք բովանդակության և/կամ օգտագործման ուղեցույց, առաջարկեք էքսկլյուզիվ ապրանքներ, որոնք իրենց կյանքը կհեշտացնեն, լսելեք/պատասխանեք նրանց, հավելվածներ/գործիքներ ստեղծեք:

Նմանատիպ մի արշավ արել է Orca Chevrolet-ը Բրազիլիայում: Ընկերությունը համագործակցել է ավտոմեքենաներ տարհանող տեղական մի ընկերության հետ և օգնում էր նոր Օռկա ժամանող վարորդներին, ովքեր ճանապարհների անանցանելիության պատճառով տեղ չէին հասնում:

5. Թույլ տվեք հաճախորդները «շփվեն» միմյանց հետ

Անկախ այն բանից, թե ինչ ապրանք կամ ծառայություն եք առաջարկում, Ձեր հաճախորդները ցանկանում են «շփվել» Ձեր ընկերության այլ հաճախորդների, կամ թեկուզ  այլ մրցակից կազմակերպությունների հաճախորդների հետ: AMC հեռուստաալիքը, օրինակ, ստեղծել է մի առցանց գործիք, որը հնարավորություն է տալիս մարդկանց զգալ ինչպես Mad Men սերիալում: American Express-ը բաց ֆորում է ստեղծել և փոքր ձեռնարկատերերին կապել է միմյանց հետ՝ նրանց տալով օգտակար կոնտակտներ:

6. Փորձարկեք նոր հնարավորություններ եւ հարթակներ

Եղեք համարձակ և օգտագործեք նոր հնարավորություններ ու հարթակներ Ձեր ապրանքանիշն առաջ մղելու համար: Ինչպես ներկայացնում է «Գլխավոր խմբագիր» ամսագրի խմբագիր և SoloPortfolio-ի սեփականատեր Քլեր ՄաքԴերմոթը, Four Seasons-ը դուրս է եկել ստանդարտ ձևերից և ներկայացրել է Pin.Pack.Go ծրագիրը Pinterest-ում: Սա զբոսաշրջային ոլորտի առաջին արշավն էր, որը թույլ էր տալիս էջի այցելուներին միասին պլանավորել ընկերության հաճախորդների ուղևորությունները:

7. Մի փոքր կծեք Apple-ից

Apple-ը առանձնահատուկ մոտեցման կարիք ունի, քանի որ սա այն ապրանքանիշն է, որն ստեղծել է իրեն պաշտպանողների ու սիրողների մի ամբողջ սերունդ: Ինչպե՞ս են դա արել: Հիշո՞ւմ եք iPod-ի ներկայացումը: Apple-ի արդեն հայտնի ռազմավարությունն իր մեջ ներառում էր կարեկցանք, կենտրոնացում և տպավորություն, երբ նրանք օգտագործում էին iPod օգտագործող երջանիկ մարդկանց սիլուետներ: Միգուցե այն լավագույն MP3 նվագարկիչը չէր, սակայն այն ստեղծեց ապրանքանիշի ճանաչելիությունը, ինչն էլ օգնեց շուկայում առաջատար դիրք գրավել:

8. Զվարճացեք

Դուք հավանաբար երբևէ չէիք լսել Dollar Shave Club-ի մասին մինչև YouTube-ում հումորային տեսահոլովակ թողարկելը: Ընկերությունը շարունակում է իր որդեգրած ռազմավարությունը սափրվելու համար պարագաներ արտադրողների ոլորտում: Իսկ Taco Bell-ը և Old Spice-ը ընկերությունների օրինակներ են, որոնք զվարճանում են իրենց մարքեթինգային արշավների ընթացքում: Նրանք իրականացնում են նույնիսկ այնպիսի արշավներ, որոնց ոչ ոք չէր սպասում:

Մեկ այլ լավ օրինակ է Catepillar-ի «Built for It» արշավը, որտեղ շինարարական 5 հսկա մեքենաներով խաղում են Jenga խաղը:

9. Ներգրավեք աշխատակիցներին

Թող աշխատակիցները լինեն Ձեր ամենամեծ նվիրյալները և ապրանքանիշի դեսպանները: Հենց այս գաղափարախոսությունն է եղել Caterpillar-ի «Built for It» արշավի հիմքում: Նկարահանված տեսահոլովակների հիմքում աշխատակիցների հավատարմությունն էր ապրանքանիշի հանդեպ, որը և մոտիվացնում էր հենց աշխատակիցներին տարածել տեսահոլովակներն իրենց ընկերների և հարազատների շրջանում:

10. Եղեք փոքր-ինչ տարօրինակ

Միշտ չէ, որ պետք է զգուշավորություն ցուցաբերել: Երբեմն պետք է կոտրել կարծրատիպերը և փոքր-ինչ տարօրինակ լինել: Օրինակ, Շոտլանդիայի Գլասգո քաղաքում FM 96.3 ռադիոկայանի գործարկման առթիվ ամբողջ քաղաքով մեկ կիթառի դատարկ դարակաշարեր տեղադրեցին: Ուզո՞ւմ եք իմանալ իմաստը և նպատակը: Ուրեմն ամեն դարակաշար նշան ուներ իր վրա, որտեղ գրված էր․ «Անվճար երևակայական կիթառ: Վերցրու մեկը»: Այն յուրահատուկ էր և իդեալականորեն համապատասխանում է ապրանքանիշին․ ո՞վ ռադիո լսելուց չի նվագել երևակայական կիթառով:

11. Մի մոռացեք ներկայիս հաճախորդների մասին

Ես գիտեմ, որ կարևոր է նոր հաճախորդներ ձեռք բերելը, եթե ցանկանում եք Ձեր բիզնեսն աճի: Բայց մի մոռացեք այն հաճախորդների մասին, որոնք արդեն կան: Ինչպես Բելլ Բեթ Քուփերն է նշում Buffer Blog-ում, կարող եք օգտագործել «գլխիվայր շրջված ձագարի» (upside-down funnel) մոտեցումը: Սա կօգնի առկա հաճախորդներին իրենց զգալ որպես էքսկլուզիվ ակումբի անդամ: Լրացուցիչ ինչ որ բան առաջարկելով՝ կօգնեք նրանց զգալ շատ կարևոր անձնավորություն Ձեր ապրանքանիշի համար:

12. Օգտագործեք մեծ տվյալները թիրախային հաճախորդներին հասնելու համար

Մեծ տվյալներն (big data) օգնում են մանրածախ առևտրով զբաղվողներին թիրախավորել հստակ հաճախորդների: Red Roof Inn-ն օգտագործում է չեղարկված թռիչքների տեղեկատվությունը անորոշության մեջ գտնվող ճանապարհորդներին հաղորդագրություններ ուղարկելու համար: Պիցցերիաների ցանցն օգտագործում է տվյալները վատ եղանակային պայմաններում ապրող կամ էլեկտրաէներգիայի անջատումներ ունեցող հաճախորդներին հյուրասիրության կտրոններ ուղարկելու համար: Կարճ ասած, մեծ տվյալները կարող են օգտագործվել գնումների միտումները կանխատեսելու համար: Այս տեղեկատվությամբ Դուք կարող եք կապի մեջ լինել հաճախորդների հետ, մինչև նրանք կփնտրեն Ձեր ծառայությունները կամ ապրանքները:

13. Ձեռնարկություն բետոնե ջունգլիներում

Դուք դեռ կարող եք փոքր օֆլայն մարքեթինգային քայլեր անել Ձեր ապրանքի կամ ծառայության շուրջ աղմուկ բարձրացնելու համար: Օրինակ, կարող եք նկարիչ վարձել, ով գրաֆֆիտի կնկարի (իհարկե թույլտվության առկայության դեպքում): Դուք կարող եք նաև գնալ Citi Bike-ի ուղով։ Հեծանվորդները կարող են Ձեր ապրանքանիշով հեծանիվներ վարել քաղաքում և դա ուշադրություն կգրավի: Եվս մեկ լավ օրինակ է Կոպենհագենի կենդանաբանական այգին, որը քաղաքային ավտոբուսների վրա փակցրեց պատկերներ և նայելով դրանց տպավորություն էր ստեղծվում, թե դրանք սեղմված են հսկա անակոնդայի կողմից:

14. Ստեղծեք նոստալգիա

Մի ձեռնարկատեր հետաքրքիր բացահայտումով է կիսվել սպառողների մասին հետազոտությունները լուսաբանող ամսագրում: Հետազոտությունը բացահայտել է, որ մարդիկ ավելի շատ պատրաստ են վճարել այն ապրանքների համար, որոնք արթնացնում են անցյալի հուշեր, ի տարբերություն այն ապրանքների, որոնց հետ դեռ էմոցիոնալ կապ չունեն: Մեկ այլ հետազոտություն ապացուցել է այս փաստը: Մասնավորապես ասվում է, որ մարդիկ պատրաստ են վճարել, երբ իրենց մոտ արթնանում է նոստալգիկ հիշողություն: Երևի թե հենց այդ պատճառով է, որ Coca-Cola-ի, Calvin Klein-ի և Internet Explorer-ի նման ընկերությունները միլենիալներին դեպի 90-ականներ վերադարձնող արշավներ են իրականացնում:

15. Պատմեք պատմություններ

Պատմություններ պատմելը մարքեթինգի ամենաարդյունավետ մեթոդներից մեկն է: Բայց ինչպե՞ս եք այն արդիականացնելու և համապատասխանեցնելու ժամանակի պահանջներին: Axe-ի «Susan Glenn»-ը ժամանակակից պատմության լավագույն օրինակներից է, որը տարածվել է տարբեր մեդիա հարթակներով: Եթե հիշում եք, Axe-ը ներխուժում է հիշողությունների մեջ և հիշում մի աղջկա, ով վաղուց լքել և գնացել է: Թիրախային լսարանը գտնվում էր ինտերնետային տարբեր հարթակներում, և պատմությունը նրանց հասցնելու համար ընկերությունը յուրաքանչյուր հարթակում տարբեր ձևով էր պատմում: Կար նաև 1 րոպեանոց ֆիլմ, որը պտտվում էր Թայմ Սքուերի ինտերակտիվ էկրաններով:

Վերջաբան

Ձեր մարքեթինգային ջանքերով պատին հարվածելը կարող է խորտակել Ձեր բիզնեսը և խորացնել հիասթափությունը:  Պետք է գործի անցնելուց առաջ լրջորեն  մտածել ռազմավարության  մասին և մշակել Ձեր բիզնեսին համապատասխան ռազմավարական  մշակույթ: Անհրաժեշտ է հիշել, որ երբեք տեղ չես հասնի, եթե չգիտես՝ ուր ես գնում։

Իսկ ի՞նչ ռազմավարություն եք Դուք որդեգրել Ձեր մարքեթինգային գաղափարները կյանքի կոչելու համար:

 

Մյուրեյ Նյուլենդս

Հեղինակ

Inc.com

Օրիգինալ հոդվածն՝ այստեղ։

Թարգմանությունը՝ Վահագն Քեշիշյան